హిల్ట్ పాలసీ ద్వారా అక్రమాలు చేసేందుకు కాంగ్రెస్ ప్రభుత్వం ప్రయత్నిస్తుందని బిజెపి రాష్ట్ర అధ్యక్షుడు రామచందర్ రావు తెలిపారు. 9 వేల ఎకరాలను రియల్ ఎస్టేట్ వ్యాపారం చేసేందుకు ప్రయత్నం చేస్తుందని అన్నారు. రాజ్ భవన్ లో గవర్నర్ ను బిజెపి బృందం కలిసింది. ఈ సందర్భంగా ఆయన మీడియాతో మాట్లాడుతూ జివొ నెంబరు 27న విత్ డ్రా చేసేలా చూడాలని గవర్నర్ ను కోరామని తెలియజేశారు. హిల్ట్ పాలసీ ద్వారా అక్రమాలు చేసేందుకు ప్రభుత్వం ప్రయత్నిస్తుందని, అప్పటి, ఇప్పటి ధరలు పోల్చి చూస్తే అక్రమాలు తెలుస్తున్నాయని అన్నారు. ఈ ప్రభుత్వం ప్రజావ్యతిరేక విధానాలు అమలు చేస్తోందని విమర్శించారు. కోకా పేటలో ఇటీవల ఎకరం ఎంత పలికిందో మనం చూశామని, జిఎహెచ్ఎంసి విస్తరణలోనూ అనేక కుట్రలు ఉన్నాయని మండిపడ్డారు. ఈ నెల 7న ఇందిరాపార్కు వద్ద మహాధర్నా నిర్వహిస్తామని అన్నారు.
